daur hota tha bas mohabbat ka

daur hotā thā bas mohabbat kā

ek rasta thā bas mohabbat kā

ruuh sarshār ho rahī thī mirī

mujh pe saaya thā bas mohabbat kā

aur to koī baat thī hī nahīñ

ik taqāzā thā bas mohabbat kā

ab vo chaupāl kyā huī ki jahāñ

zikr chaltā thā bas mohabbat kā

kitne ḳhush-hāl the 'avām mire

ajr miltā thā bas mohabbat kā

jis pe aa kar ruke the ham donoñ

ek ziina thā bas mohabbat kā

vo koī qaid to nahīñ thī magar

dā.ira sā thā bas mohabbat kā

aur phir vo bhī maiñ uchhāl aayā

ek sikka thā bas mohabbat kā

ham hifāzat ke saath baiThe the

koī konā thā bas mohabbat kā

haa.e afsos tum ġhalat samjhe

koī bhūkā thā bas mohabbat kā

daur hota tha bas mohabbat ka

ek rasta tha bas mohabbat ka

ruh sarshaar ho rahi thi meri

mujh pe saya tha bas mohabbat ka

aur to koi baat thi hi nahin

ek taqaza tha bas mohabbat ka

ab wo chaupal kya hui ki jahan

zikr chalta tha bas mohabbat ka

kitne KHush-haal the 'awam mere

ajr milta tha bas mohabbat ka

jis pe aa kar ruke the hum donon

ek zina tha bas mohabbat ka

wo koi qaid to nahin thi magar

daira sa tha bas mohabbat ka

aur phir wo bhi main uchhaal aaya

ek sikka tha bas mohabbat ka

hum hifazat ke sath baiThe the

koi kona tha bas mohabbat ka

hae afsos tum ghalat samjhe

koi bhuka tha bas mohabbat ka