wo kahte hain abhi se rashk ghairon ki mohabbat par

vo kahte haiñ abhī se rashk ġhairoñ kī mohabbat par

ilāhī ḳhair ye dā'vā tumheñ do din kī chāhat par

burā kah lo sazā de lo mujhe tum jurm-e-ulfat par

ḳhafā hone se kyā matlab hai iz.hār-e-mohabbat par

vo kahte haiñ kahe jaao mujhe tum ghūrte kyuuñ ho

tumhārā qissa-e-ġham kyā likhā hai merī sūrat par

tum apne tālib-e-dīdār ko be-sabr kahte ho

na dekho aa.ina ḳhud bhī jo qādir ho tabī'at par

vo bosa de ke kahte haiñ baḌe dil pherne vaale

unheñ dil pher degā koī ik bose kī hujjat par

vo aksar pūchhte haiñ mujh se kis par jaan jaatī hai

magar himmat nahīñ paḌtī ki keh duuñ ḳhud badaulat par

diye detā hai dil kis sang-dil ko soch to dil meñ

'qamar' nādān hai patthar paḌeñ terī burī mat par

wo kahte hain abhi se rashk ghairon ki mohabbat par

ilahi KHair ye da'wa tumhein do din ki chahat par

bura kah lo saza de lo mujhe tum jurm-e-ulfat par

KHafa hone se kya matlab hai izhaar-e-mohabbat par

wo kahte hain kahe jao mujhe tum ghurte kyun ho

tumhaara qissa-e-gham kya likha hai meri surat par

tum apne talib-e-didar ko be-sabr kahte ho

na dekho aaina KHud bhi jo qadir ho tabi'at par

wo bosa de ke kahte hain baDe dil pherne wale

unhen dil pher dega koi ek bose ki hujjat par

wo aksar puchhte hain mujh se kis par jaan jati hai

magar himmat nahin paDti ki keh dun KHud badaulat par

diye deta hai dil kis sang-dil ko soch to dil mein

'qamar' nadan hai patthar paDen teri buri mat par