naz be-ja hai gaya ishq ka aazar kahan

naaz be-jā hai gayā 'ishq kā āzār kahāñ

ai masīhā hue achchhe tire bīmār kahāñ

qadr-dāñ husn-e-ḳhudā-dād kā ai yaar kahāñ

haiñ hasīñ tum se bahut ham se ḳharīdār kahāñ

kā'ba-o-dair meñ yā sū-e-kalīsā ai dost

shauq meñ jaa.e tirā tālib-e-dīdār kahāñ

aa ke pūchhegā farishtoñ se vo but roz-e-jazā

'arsa-e-hashr meñ haiñ mere gunah-gār kahāñ

shu'ara kaise haiñ nā-fahm ki dete haiñ misāl

kabk kī chaal kahāñ aap kī raftār kahāñ

kūcha-e-yār bhī hai misr kā bāzār bhī hai

husn kī jins ko leñ jā ke ḳharīdār kahāñ

rahmat-e-haq se ye pūchheñge malak hashr ke din

ḳhuld vo hai ye saqar jaa.eñ gunah-gār kahāñ

turbat-e-ġhair pe zīnat hai na raunaq yaaro

dekho to haiñ gul-e-naqsh-e-qadam-e-yār kahāñ

kuchh patā do ki maiñ dil thāñbe hue aa.uuñ vahīñ

uTh ke pahlū se mire jaate ho ai yaar kahāñ

lab-e-tasnīm pe pahuñcheñ ki kinār-e-kausar

sāqiyā hashr ko aa.eñ tire mai-ḳhvār kahāñ

jaao bhī tiir ye kis tarh lagāyā tum ne

rah gayā dil meñ kaleje se huā paar kahāñ

aa.e un añkhḌiyoñ meñ vasl kī shab gahrī niiñd

tāle' aisā hai 'fasāhat' mirā bedār kahāñ

naz be-ja hai gaya 'ishq ka aazar kahan

ai masiha hue achchhe tere bimar kahan

qadr-dan husn-e-KHuda-dad ka ai yar kahan

hain hasin tum se bahut hum se KHaridar kahan

ka'ba-o-dair mein ya su-e-kalisa ai dost

shauq mein jae tera talib-e-didar kahan

aa ke puchhega farishton se wo but roz-e-jaza

'arsa-e-hashr mein hain mere gunah-gar kahan

shu'ara kaise hain na-fahm ki dete hain misal

kabk ki chaal kahan aap ki raftar kahan

kucha-e-yar bhi hai misr ka bazar bhi hai

husn ki jins ko len ja ke KHaridar kahan

rahmat-e-haq se ye puchhenge malak hashr ke din

KHuld wo hai ye saqar jaen gunah-gar kahan

turbat-e-ghair pe zinat hai na raunaq yaro

dekho to hain gul-e-naqsh-e-qadam-e-yar kahan

kuchh pata do ki main dil thanbe hue aaun wahin

uTh ke pahlu se mere jate ho ai yar kahan

lab-e-tasnim pe pahunchen ki kinar-e-kausar

saqiya hashr ko aaen tere mai-KHwar kahan

jao bhi tir ye kis tarh lagaya tum ne

rah gaya dil mein kaleje se hua par kahan

aae un ankhDiyon mein wasl ki shab gahri nind

tale' aisa hai 'fasahat' mera bedar kahan