jate jate hi koi baat to karte jao

jaate jaate hī koī baat to karte jaao

dard-mandoñ se mulāqāt to karte jaao

dasht-e-tanhā.ī meñ ham tum se bichhaḌ kar jī leñ

aise kuchh talḳh se hālāt to karte jaao

kyā ye tūfān yuuñ hī saath meñ le jāoge

ham se iz.hār-e-ḳhayālāt to karte jaao

tum ne duniyā ko tabassum ke ḳhazāne bāñTe

kuchh hameñ bhī yahī ḳhairāt to karte jaao

jin savāloñ ke sabab dil kā gulistāñ ujḌā

aaj ham se vo savālāt to karte jaao

saarī duniyā ne kiye zulm hamāre uupar

tum bhī kuchh ham pe 'ināyāt to karte jaao

zaḳhmoñ ke daaġh nahīñ ye haiñ mazārāt-e-vafā

in mazāroñ kī ziyārāt to karte jaao

jate jate hi koi baat to karte jao

dard-mandon se mulaqat to karte jao

dasht-e-tanhai mein hum tum se bichhaD kar ji len

aise kuchh talKH se haalat to karte jao

kya ye tufan yun hi sath mein le jaoge

hum se izhaar-e-KHayalat to karte jao

tum ne duniya ko tabassum ke KHazane banTe

kuchh hamein bhi yahi KHairaat to karte jao

jin sawalon ke sabab dil ka gulistan ujDa

aaj hum se wo sawalat to karte jao

sari duniya ne kiye zulm hamare upar

tum bhi kuchh hum pe 'inayat to karte jao

zaKHmon ke dagh nahin ye hain mazaraat-e-wafa

in mazaron ki ziyaraat to karte jao