ishq mujhse hai to phir baat kisi aur se kyun

'ishq mujh se hai to phir baat kisī aur se kyuuñ

mere hisse kī mulāqāt kisī aur se kyuuñ

mujh se pūchho mire baare meñ jo chāho lekin

merī hālat pe savālāt kisī aur se kyuuñ

apne matlab ko lipaT jaatā hai vo kyuuñ mujh se

aur mohabbat kī karāmāt kisī aur se kyuuñ

dukh to ye hai jo mire saath meñ jiine the use

bāñTtā hai vahī lamhāt kisī aur se kyuuñ

us ko mā'lūm hai jab us pe hañseñgī duniyā

vo bayāñ kartā hai hālāt kisī aur se kyuuñ

maiñ ne likkhe the jo āñkhoñ pe tumhārī jānāñ

sunñe aa.e ho vo naġhmāt kisī aur se kyuuñ

apnī aulād se bhī mil na sakā is kā javāb

mel khāte haiñ ḳhayālāt kisī aur se kyuuñ

mujh ko ye fikr hai 'āsif' ki mire hote hue

mere yāroñ ko hoñ ḳhatrāt kisī aur se kyuuñ

'ishq mujh se hai to phir baat kisi aur se kyun

mere hisse ki mulaqat kisi aur se kyun

mujh se puchho mere bare mein jo chaho lekin

meri haalat pe sawalat kisi aur se kyun

apne matlab ko lipaT jata hai wo kyun mujh se

aur mohabbat ki karamat kisi aur se kyun

dukh to ye hai jo mere sath mein jine the use

banTta hai wahi lamhat kisi aur se kyun

us ko ma'lum hai jab us pe hansengi duniya

wo bayan karta hai haalat kisi aur se kyun

main ne likkhe the jo aankhon pe tumhaari jaanan

sunne aae ho wo naghmat kisi aur se kyun

apni aulad se bhi mil na saka is ka jawab

mel khate hain KHayalat kisi aur se kyun

mujh ko ye fikr hai 'asif' ki mere hote hue

mere yaron ko hon KHatraat kisi aur se kyun