ghairon ke liye kyun hamein nashad karen aap

ġhairoñ ke liye kyuuñ hameñ nāshād kareñ aap

aglī jo mohabbat thī use yaad kareñ aap

āñkhoñ kī sanā meñ ġhazal ik maiñ ne kahī hai

lāzim hai ki har she'r pe do saad kareñ aap

Thokar hī se kyā ḳhaak ho zinda mirā murda

qum apnī zabāñ se bhī to irshād kareñ aap

sah sah ke sitam ho gaye mashshāq bahut ham

jab jāneñ ki koī sitam ījād kareñ aap

aisī pur-asar thiiñ mirī aaheñ shab-e-furqat

dil thaam leñ hāthoñ se jo phir yaad kareñ aap

ai yaar abhī hausla hai charḳh kā baaqī

vo zulm se nādim ho to be-dād kareñ aap

ai hazrat-e-dil ho gaye kyuuñ shefta-e-husn

saath apne na mujh ko kahīñ barbād kareñ aap

is vāste sahtā huuñ maiñ ai yaar jafā.eñ

kuchh din to pas-e-marg mujhe yaad kareñ aap

ye zabt-e-mohabbat kī hai tākīd shab-e-hijr

dam ghuT ke bhī nikle to na fariyād kareñ aap

dāman vo jhaTakte haiñ to kahtī hai mirī ḳhaak

barbād huuñ ḳhud mujh ko na barbād kareñ aap

kam kī sifat-e-husn jo maiñ ne to vo bole

ab DhūñDh ke mā'shūq parī-zād kareñ aap

maqtal meñ agar paaoñ se ġhair aa.e to kyā faḳhr

maiñ sar ke bal aa.uuñ jo mujhe yaad kareñ aap

ai tū sahī us nāla-e-pur-dard se ho mom

dil apnā mirī samt se faulād kareñ aap

hasrat na ye rah jaa.e huzūr aap ke dil meñ

raazī huuñ maiñ be-dād pe be-dād kareñ aap

kyā lutf ujāḌā agar ābād diloñ ko

vīrān haiñ jo dil unheñ ābād kareñ aap

sab un ke sitam sah liye ham ne to ye bole

ab zulm karūñ vo ki bahut yaad kareñ aap

yaañ to kamar un kī nahīñ milne kī 'fasāhat'

qasd ab sū-e-shahr-e-‘adam-ābād kareñ aap

ghairon ke liye kyun hamein nashad karen aap

agli jo mohabbat thi use yaad karen aap

aankhon ki sana mein ghazal ek main ne kahi hai

lazim hai ki har she'r pe do sad karen aap

Thokar hi se kya KHak ho zinda mera murda

qum apni zaban se bhi to irshad karen aap

sah sah ke sitam ho gaye mashshaq bahut hum

jab jaanen ki koi sitam ijad karen aap

aisi pur-asar thin meri aahen shab-e-furqat

dil tham len hathon se jo phir yaad karen aap

ai yar abhi hausla hai charKH ka baqi

wo zulm se nadim ho to be-dad karen aap

ai hazrat-e-dil ho gaye kyun shefta-e-husn

sath apne na mujh ko kahin barbaad karen aap

is waste sahta hun main ai yar jafaen

kuchh din to pas-e-marg mujhe yaad karen aap

ye zabt-e-mohabbat ki hai takid shab-e-hijr

dam ghuT ke bhi nikle to na fariyaad karen aap

daman wo jhaTakte hain to kahti hai meri KHak

barbaad hun KHud mujh ko na barbaad karen aap

kam ki sifat-e-husn jo main ne to wo bole

ab DhunDh ke ma'shuq pari-zad karen aap

maqtal mein agar paon se ghair aae to kya faKHr

main sar ke bal aaun jo mujhe yaad karen aap

ai tu sahi us nala-e-pur-dard se ho mom

dil apna meri samt se faulad karen aap

hasrat na ye rah jae huzur aap ke dil mein

raazi hun main be-dad pe be-dad karen aap

kya lutf ujaDa agar aabaad dilon ko

viran hain jo dil unhen aabaad karen aap

sab un ke sitam sah liye hum ne to ye bole

ab zulm karun wo ki bahut yaad karen aap

yan to kamar un ki nahin milne ki 'fasahat'

qasd ab su-e-shahr-e-‘adam-abaad karen aap