ek muddat se main muskurai nahin

ek muddat se maiñ muskurā.ī nahīñ

merī ḳhushiyoñ se jab dilrubā.ī nahīñ

is liye un ko shak hai ki nārāz huuñ

koī shikva zabāñ par maiñ laa.ī nahīñ

tū jo chāhe to kar le judā apnī raah

maiñ ne kuchh qaid tujh par lagā.ī nahīñ

shād-mānī masarrat ke likhtī huuñ giit

garche ḳhushiyoñ se kuchh āshnā.ī nahīñ

pyaar mujh se bhī ulfat hai auroñ se bhī

kyā kahūñ ye agar be-vafā.ī nahīñ

maal rāh-e-ḳhudā meñ luTātī rahī

phūTī kauḌī bhī ghar meñ bachā.ī nahīñ

jis meñ zālim ko man-māniyoñ kī ho chhūT

mujh ko manzūr aisī ḳhudā.ī nahīñ

maiñ thī baal apne juuḌe meñ bāñdhe hue

phir bhī sar-kash havā baaz aa.ī nahīñ

jaane kab se hai duniyā mirī muntazir

aisī duniyā jo maiñ ne basā.ī nahīñ

tū hai 'tamsīla' ḳhush-zarf ḳhāmosh sī

āh-o-zārī nahīñ lab-kushā.ī nahīñ

ek muddat se main muskurai nahin

meri KHushiyon se jab dilrubai nahin

is liye un ko shak hai ki naraaz hun

koi shikwa zaban par main lai nahin

tu jo chahe to kar le juda apni rah

main ne kuchh qaid tujh par lagai nahin

shad-mani masarrat ke likhti hun git

garche KHushiyon se kuchh aashnai nahin

pyar mujh se bhi ulfat hai auron se bhi

kya kahun ye agar be-wafai nahin

mal rah-e-KHuda mein luTati rahi

phuTi kauDi bhi ghar mein bachai nahin

jis mein zalim ko man-maniyon ki ho chhuT

mujh ko manzur aisi KHudai nahin

main thi baal apne juDe mein bandhe hue

phir bhi sar-kash hawa baz aai nahin

jaane kab se hai duniya meri muntazir

aisi duniya jo main ne basai nahin

tu hai 'tamsila' KHush-zarf KHamosh si

aah-o-zari nahin lab-kushai nahin