aankhon ka ye hawas kyun leti na imtihan bhi

āñkhoñ kā ye havas kyuuñ letī na imtihāñ bhī

be-pardagī thī yaañ bhī be-pardagī vahāñ bhī

āvāz-e-āh-o-girya is ko na tum samajhnā

hote haiñ yaad 'āshiq kaTte haiñ sar jahāñ bhī

shikve to the bahut se ye soch kar na bole

aisā na ho ki boleñ jaatī rahe zabāñ bhī

thā muntazir zamāna jaane magar huā kyā

raaz apnā khul na paayā the garche rāz-dāñ bhī

din saumi'a meñ guzrā aur shab sanam-kade meñ

bande bhī haiñ ḳhudā ke kuchh 'āshiq-e-butāñ bhī

har-chand aa ga.e vo tere bhī ghar raqībā

itnā na ḳhud pe naazo aate haiñ vo yahāñ bhī

ab zindagī paḌegī jiinī ki aa paḌī hai

ho garche shād-mānī yā nāla-o-fuġhāñ bhī

vo muntazir qazā kī ye muntazir hai terā

rotī hai zindagānī rotā hai 'arsalāñ' bhī

aankhon ka ye hawas kyun leti na imtihan bhi

be-pardagi thi yan bhi be-pardagi wahan bhi

aawaz-e-ah-o-girya is ko na tum samajhna

hote hain yaad 'ashiq kaTte hain sar jahan bhi

shikwe to the bahut se ye soch kar na bole

aisa na ho ki bolen jati rahe zaban bhi

tha muntazir zamana jaane magar hua kya

raaz apna khul na paya the garche raaz-dan bhi

din saumi'a mein guzra aur shab sanam-kade mein

bande bhi hain KHuda ke kuchh 'ashiq-e-butan bhi

har-chand aa gae wo tere bhi ghar raqiba

itna na KHud pe nazo aate hain wo yahan bhi

ab zindagi paDegi jini ki aa paDi hai

ho garche shad-mani ya nala-o-fughan bhi

wo muntazir qaza ki ye muntazir hai tera

roti hai zindagani rota hai 'arsalan' bhi