chashm-e-saqi ne karam kuchh aise farmae ki bas

chashm-e-sāqī ne karam kuchh aise farmā.e ki bas

haath kāñpā jaam chhūTā ham vo ghabrā.e ki bas

aaj us ne ban ke qātil vo sitam Dhaa.e ki bas

chīḳh uThī shamshīr-e-ḳhūñ-āshām bhī haa.e ki bas

yuuñ to duniyā dār-e-fānī hai bahut aa.e ga.e

bāġh-e-'ālam meñ magar kuchh gul vo kumhlā.e ki bas

hāl-o-māzī kī halākat-ḳhez talḳhī kam na thī

aise chehre aaj mustaqbil ne dikhlā.e ki bas

dhaḌkaneñ aisī baḌhīñ ham rah ga.e dil thaam ke

aaj tanhā.ī meñ kuchh aise vo yaad aa.e ki bas

ho gayā labrez jab paimāna ġham kā ai 'munīr'

ashk bhar ke jām-e-hasrat aise chhalkā.e ki bas

chashm-e-saqi ne karam kuchh aise farmae ki bas

hath kanpa jam chhuTa hum wo ghabrae ki bas

aaj us ne ban ke qatil wo sitam Dhae ki bas

chiKH uThi shamshir-e-KHun-asham bhi hae ki bas

yun to duniya dar-e-fani hai bahut aae gae

bagh-e-'alam mein magar kuchh gul wo kumhlae ki bas

haal-o-mazi ki halakat-KHez talKHi kam na thi

aise chehre aaj mustaqbil ne dikhlae ki bas

dhaDkanen aisi baDhin hum rah gae dil tham ke

aaj tanhai mein kuchh aise wo yaad aae ki bas

ho gaya labrez jab paimana gham ka ai 'munir'

ashk bhar ke jam-e-hasrat aise chhalkae ki bas