yun KHushi se su-e-maqtal un ke diwane gae

yuuñ ḳhushī se sū-e-maqtal un ke dīvāne ga.e

jaise jaltī sham' par girne ko parvāne ga.e

maiñ zamāne meñ huā rusvā tumhāre 'ishq meñ

tum to mere 'ishq mere ġham se pahchāne ga.e

gul se 'āriz barg-e-gul se lab kī yaad aane lagī

ham gulistāñ meñ jab apne ġham ko bahlāne ga.e

hai qayāmat par qayāmat qāmat-e-bālā-e-dost

vo hazāroñ hī meñ kyā lākhoñ meñ pahchāne ga.e

aap tak pahuñchī na mere karb mere ġham kī baat

duur tak merī ġham-angezī ke afsāne ga.e

zarf-e-mai-noshī na jin meñ tāqat-e-mīnā-kashī

kin larazte kāñpte hāthoñ meñ paimāne ga.e

nāseh-e-nādāñ mohabbat ke masā.il aur haiñ

ḳhud na samjhe aur dīvānoñ ko samjhāne ga.e

kyā kaheñ kis se kaheñ dard-e-mohabbat soz-e-ġham

ham agarche ahl-e-dil ahl-e-nazar maane ga.e

ho gayā tauhīd-e-husn-o-'ishq kā raaz āshkār

aap hī ḳhud kho ga.e jab ham use paane ga.e

kis ne āsānī se paa.ī hai kamāl-e-fan kī daad

ham ne manvāyā zamāne se to ham maane ga.e

dil kī ḳhātir is qadar tahqīr ke bā-vasf bhī

phir usī kūche meñ 'tābāñ' Thokareñ khāne ga.e

yun KHushi se su-e-maqtal un ke diwane gae

jaise jalti sham' par girne ko parwane gae

main zamane mein hua ruswa tumhaare 'ishq mein

tum to mere 'ishq mere gham se pahchane gae

gul se 'ariz barg-e-gul se lab ki yaad aane lagi

hum gulistan mein jab apne gham ko bahlane gae

hai qayamat par qayamat qamat-e-baala-e-dost

wo hazaron hi mein kya lakhon mein pahchane gae

aap tak pahunchi na mere karb mere gham ki baat

dur tak meri gham-angezi ke afsane gae

zarf-e-mai-noshi na jin mein taqat-e-mina-kashi

kin larazte kanpte hathon mein paimane gae

naseh-e-nadan mohabbat ke masail aur hain

KHud na samjhe aur diwanon ko samjhane gae

kya kahen kis se kahen dard-e-mohabbat soz-e-gham

hum agarche ahl-e-dil ahl-e-nazar mane gae

ho gaya tauhid-e-husn-o-'ishq ka raaz aashkar

aap hi KHud kho gae jab hum use pane gae

kis ne aasani se pai hai kamal-e-fan ki dad

hum ne manwaya zamane se to hum mane gae

dil ki KHatir is qadar tahqir ke ba-wasf bhi

phir usi kuche mein 'taban' Thokaren khane gae