shahron ke shor-o-ghul se koi wasta na ho

shahroñ ke shor-o-ġhul se koī vāsta na ho

jī chāhtā hai koī mirā āshnā na ho

pahle to itnī bhiiḌ na aatī thī gaañv se

shahroñ kī dil-kashī meñ izāfa huā na ho

khilte the pahle fikr ke gul shāḳh-e-zehn se

daur-e-ḳhizāñ ne ziist pe qabza kiyā na ho

kyuuñ dopahar meñ bachche pareshān ghar meñ haiñ

aamoñ kā peḌ un ke liye jhūmtā na ho

do buuñd ke nishān haiñ ḳhat ke javāb meñ

kāġhaz pe us kī aañkh se aañsū girā na ho

mat diije us ke haath ko ilzām ḳhuun kā

nāzuk hatheliyoñ pe vo rang-e-hinā na ho

kahtī hai ḳhāk-e-qabr ye naḳhvat-tarāz se

vo kaun hai jo dahr meñ aa ke fanā na ho

is hoḌ meñ haiñ sab ke makāñ aag par 'zafar'

mere muqāble meñ koī dūsrā na ho

shahron ke shor-o-ghul se koi wasta na ho

ji chahta hai koi mera aashna na ho

pahle to itni bhiD na aati thi ganw se

shahron ki dil-kashi mein izafa hua na ho

khilte the pahle fikr ke gul shaKH-e-zehn se

daur-e-KHizan ne zist pe qabza kiya na ho

kyun dopahar mein bachche pareshan ghar mein hain

aamon ka peD un ke liye jhumta na ho

do bund ke nishan hain KHat ke jawab mein

kaghaz pe us ki aankh se aansu gira na ho

mat dije us ke hath ko ilzam KHun ka

nazuk hatheliyon pe wo rang-e-hina na ho

kahti hai KHak-e-qabr ye naKHwat-taraaz se

wo kaun hai jo dahr mein aa ke fana na ho

is hoD mein hain sab ke makan aag par 'zafar'

mere muqable mein koi dusra na ho