نظر نواز تو ہیں بحر و بر ہمارے لیے

نظر نواز تو ہیں بحر و بر ہمارے لیے

وبال جاں ہی سہی بال و پر ہمارے لیے

کہیں فضا میں بسایا ہے عکس ناب کا شہر

کہیں ہوا میں بنایا ہے گھر ہمارے لیے

وہ برگ تازہ نہیں لوح سبز تھی جس پر

لکھی ہوئی تھی نئی اک خبر ہمارے لیے

ہماری موج نگہ نے مٹا دیے ورنہ

ہزار نقش بنے خاک پر ہمارے لیے

پڑے ہوئے تھے خس و خار کی طرح لیکن

اٹھا نہ سنگ سیہ سے شرر ہمارے لیے

کوئی برستا رہا قہر کی گھٹا بن کر

کوئی ترستا رہا عمر بھر ہمارے لیے

کنار دشت پہ دیوار سا کھڑا ہے ابھی

بلائے خواب سفر کا خطر ہمارے لیے

کیا ہلاک ہمیں دشمنوں نے رستے میں

سجے ہوئے تھے یہاں بام و در ہمارے لیے

غزل میں ٹانکتے ہیں وصل و ہجر کے مضموں

کہ رہ گیا ہے یہی اک ہنر ہمارے لیے