bichhaD ke shaKH se galiyon mein pattiyan niklin

bichhaḌ ke shāḳh se galiyoñ meñ pattiyāñ niklīñ

relief camp se kal rotī bībiyāñ niklīñ

ravāñ thā shahr meñ nārāz pāniyoñ kā julūs

makīn Duub gaye jab to kashtiyāñ niklīñ

chhatoñ pe rahne lage log aur kyā karte

ki har makān kī paanī meñ sīḌhiyāñ niklīñ

fasīl-e-āb razākār par girī dham se

TaTolī jeb jo us kī to bāliyāñ niklīñ

muhāfizoñ meñ huī vo laḌā.ī malbe par

mare huoñ kī virāsat pe barchhiyāñ niklīñ

khulī jo dhuup makānāt gir gaye 'mas'ūd'

zamīñ ke jism se kirnoñ kī kirchiyāñ niklīñ

bichhaD ke shaKH se galiyon mein pattiyan niklin

relief camp se kal roti bibiyan niklin

rawan tha shahr mein naraaz paniyon ka julus

makin Dub gaye jab to kashtiyan niklin

chhaton pe rahne lage log aur kya karte

ki har makan ki pani mein siDhiyan niklin

fasil-e-ab razakar par giri dham se

TaToli jeb jo us ki to baaliyan niklin

muhafizon mein hui wo laDai malbe par

mare huon ki wirasat pe barchhiyan niklin

khuli jo dhup makanat gir gaye 'mas'ud'

zamin ke jism se kirnon ki kirchiyan niklin