shab wahi lekin sitara aur hai

shab vahī lekin sitāra aur hai

ab safar kā isti.āra aur hai

ek muTThī ret meñ kaise rahe

is samundar kā kināra aur hai

mauj ke muḌne meñ kitnī der hai

naav Daalī aur dhārā aur hai

jañg kā hathiyār tai kuchh aur thā

tiir siine meñ utārā aur hai

matn meñ to jurm sābit hai magar

hāshiya saare kā saarā aur hai

saath to merā zamīñ detī magar

āsmāñ kā hī ishāra aur hai

dhuup meñ dīvār hī kaam aa.egī

tez bārish kā sahārā aur hai

hārne meñ ik anā kī baat thī

jiit jaane meñ ḳhasārā aur hai

sukh ke mausam uñgliyoñ par gin liye

fasl-e-ġham kā goshvāra aur hai

der se palkeñ nahīñ jhapkīñ mirī

pesh-e-jāñ ab ke nazāra aur hai

aur kuchh pal us kā rasta dekh luuñ

āsmāñ par ek taara aur hai

had charāġhoñ kī yahāñ se ḳhatm hai

aaj se rasta hamārā aur hai

shab wahi lekin sitara aur hai

ab safar ka istiara aur hai

ek muTThi ret mein kaise rahe

is samundar ka kinara aur hai

mauj ke muDne mein kitni der hai

naw Dali aur dhaara aur hai

jang ka hathiyar tai kuchh aur tha

tir sine mein utara aur hai

matn mein to jurm sabit hai magar

hashiya sare ka sara aur hai

sath to mera zamin deti magar

aasman ka hi ishaara aur hai

dhup mein diwar hi kaam aaegi

tez barish ka sahaara aur hai

haarne mein ek ana ki baat thi

jit jaane mein KHasara aur hai

sukh ke mausam ungliyon par gin liye

fasl-e-gham ka goshwara aur hai

der se palken nahin jhapkin meri

pesh-e-jaan ab ke nazara aur hai

aur kuchh pal us ka rasta dekh lun

aasman par ek tara aur hai

had charaghon ki yahan se KHatm hai

aaj se rasta hamara aur hai