tishna-labi se itne hue bad-hawas log

tishna-labī se itne hue bad-havās log

sūkhe kuñvoñ se kahne lage pyaas pyaas log

hote haiñ is liye bhī yahāñ par hirās log

logoñ se hī lagā.e hue haiñ jo aas log

chāhā to ek shaḳhs bhī hāsil nahīñ huā

dekhā to phir rahe the mire ās-pās log

ye hādsa nahīñ koī sāzish hai dosto

ġharqāb kaise ho gaye dariyā-shanās log

chehre pe koī fikr ho bikhre hue hoñ baal

kyā hī hasīn lagte haiñ phir ham udaas log

ham ḳhush-mizāj log the rakkhe hī rah gaye

har shaḳhs chāhtā hai yahāñ ḳhush-libās log

'kāshif' yahāñ pe aap kā kyā kaam jā.iye

baiThe hue haiñ saare yahāñ ḳhaas ḳhaas log

tishna-labi se itne hue bad-hawas log

sukhe kunwon se kahne lage pyas pyas log

hote hain is liye bhi yahan par hiras log

logon se hi lagae hue hain jo aas log

chaha to ek shaKHs bhi hasil nahin hua

dekha to phir rahe the mere aas-pas log

ye hadsa nahin koi sazish hai dosto

gharqab kaise ho gaye dariya-shanas log

chehre pe koi fikr ho bikhre hue hon baal

kya hi hasin lagte hain phir hum udas log

hum KHush-mizaj log the rakkhe hi rah gaye

har shaKHs chahta hai yahan KHush-libas log

'kashif' yahan pe aap ka kya kaam jaiye

baiThe hue hain sare yahan KHas KHas log