is tarh meri zat ko uljha diya gaya

is tarh merī zaat ko uljhā diyā gayā

saa.e ko tez dhuup meñ phailā diyā gayā

merī zabān merā hī ḳhuuñ chāTne lagī

mujh ko mire hī naam kā dhokā diyā gayā

āñkheñ jalīñ jo talḳhī-e-hālāt se kabhī

lafzoñ kā shahd kaan meñ Tapkā diyā gayā

jin ke lahū kī zau se munavvar the rāste

manzil ko dekh kar unheñ Thukrā diyā gayā

ummīd kī kiran ko añdhere nigal gaye

paanī dikhā ke pyaas ko bhaḌkā diyā gayā

gum ho ga.ī sukūt meñ tūfāñ kī bāz-gasht

sāhil kā jism mauj ko pahnā diyā gayā

mere lahū se hiddat-e-ehsās chhīn kar

merā vujūd phir mujhe lauTā diyā gayā

TukḌe ham aa.ine ke sañbhālā kiye 'ra.ūf'

ham se na apnī laash ko kāñdhā diyā gayā

is tarh meri zat ko uljha diya gaya

sae ko tez dhup mein phaila diya gaya

meri zaban mera hi KHun chaTne lagi

mujh ko mere hi nam ka dhoka diya gaya

aankhen jalin jo talKHi-e-haalat se kabhi

lafzon ka shahd kan mein Tapka diya gaya

jin ke lahu ki zau se munawwar the raste

manzil ko dekh kar unhen Thukra diya gaya

ummid ki kiran ko andhere nigal gaye

pani dikha ke pyas ko bhaDka diya gaya

gum ho gai sukut mein tufan ki baz-gasht

sahil ka jism mauj ko pahna diya gaya

mere lahu se hiddat-e-ehsas chhin kar

mera wujud phir mujhe lauTa diya gaya

TukDe hum aaine ke sanbhaala kiye 'rauf'

hum se na apni lash ko kandha diya gaya