sapne ki wadi ko taj kar rup-nagar mein aaya kar

sapne kī vaadī ko taj kar rūp-nagar meñ aayā kar

din ke phaile kāġhaz par apnī tasvīr banāyā kar

dhuup kaḌī hai nañgā sar hī sahrāoñ se guzrūñgā

apne dupaTTe ke pallū kā mere sar par saayā kar

ek samundar kī maujoñ ko ek bhañvar meñ rahne de

niilī āñkhoñ ke sāgar ko aise mat chhalkāyā kar

hoñT kī surḳhī jhāñk uThtī hai shīshe ke paimānoñ se

miTTī ke bartan meñ paanī pī kar pyaas bujhāyā kar

dil kī āvāzoñ kā gumbad ābādī meñ phahTtā hai

duur kisī ḳhāmosh kueñ meñ muñh laTkā kar gaayā kar

biis baras se ik taare par man kī jot jagātā huuñ

dīvālī kī raat ko tū bhī koī diyā jalāyā kar

'mājid' ne bairāg liyā hai koī aisī baat nahīñ

idhar udhar kī bāteñ kar ke logoñ ko samjhāyā kar

sapne ki wadi ko taj kar rup-nagar mein aaya kar

din ke phaile kaghaz par apni taswir banaya kar

dhup kaDi hai nanga sar hi sahraon se guzrunga

apne dupaTTe ke pallu ka mere sar par saya kar

ek samundar ki maujon ko ek bhanwar mein rahne de

nili aankhon ke sagar ko aise mat chhalkaya kar

honT ki surKHi jhank uThti hai shishe ke paimanon se

miTTi ke bartan mein pani pi kar pyas bujhaya kar

dil ki aawazon ka gumbad aabaadi mein phahTta hai

dur kisi KHamosh kuen mein munh laTka kar gaya kar

bis baras se ek tare par man ki jot jagata hun

diwali ki raat ko tu bhi koi diya jalaya kar

'majid' ne bairag liya hai koi aisi baat nahin

idhar udhar ki baaten kar ke logon ko samjhaya kar