raat ko din ke ujale mein badal aaya hun

raat ko din ke ujāle meñ badal aayā huuñ

ik pahelī ko jahāñ kar ke maiñ hal aayā huuñ

ab ye mumkin hai ki ghar-bār bachā le aa.uuñ

maiñ mohabbat ke ḳhasāre se nikal aayā huuñ

baat ye aur ki be-vaqt bujhe haiñ taare

dosh ye aur ki maiñ āḳhrī pal aayā huuñ

apnā kuchh haal sunā.ūñ bhī to kaise tum ko

bas yuuñ samjho ki burā vaqt thā Tal aayā huuñ

us samundar ko talātum hai milā virse meñ

aur maiñ dariyā kā bhañvar huuñ jo ubal aayā huuñ

tū ne andāz-e-bayāñ par mire lab chūme the

le tire sāmne ab ban ke ġhazal aayā huuñ

raat ko din ke ujale mein badal aaya hun

ek paheli ko jahan kar ke main hal aaya hun

ab ye mumkin hai ki ghar-bar bacha le aaun

main mohabbat ke KHasare se nikal aaya hun

baat ye aur ki be-waqt bujhe hain tare

dosh ye aur ki main aaKHri pal aaya hun

apna kuchh haal sunaun bhi to kaise tum ko

bas yun samjho ki bura waqt tha Tal aaya hun

us samundar ko talatum hai mila wirse mein

aur main dariya ka bhanwar hun jo ubal aaya hun

tu ne andaz-e-bayan par mere lab chume the

le tere samne ab ban ke ghazal aaya hun