diwar kho gai to kabhi dar bichhaD gaya

dīvār kho ga.ī to kabhī dar bichhaḌ gayā

ik ek kar ke mujh se mirā ghar bichhaḌ gayā

ḳhush to bahut huā huuñ jazīre pe aa ke maiñ

lekin ye dukh bhī hai ki samundar bichhaḌ gayā

āñkheñ jhapak ke dekhnā mahñgā paḌā mujhe

lamhe kī der thī ki vo manzar bichhaḌ gayā

dastār us ke paaoñ meñ rakkhī to ye khulā

jaañ bach ga.ī hamārī magar sar bichhaḌ gayā

apnī ḳhusūsiyāt kā idrāk tab huā

jab mujh se ek shab mirā lashkar bichhaḌ gayā

saa.e pe iktifā na kiyā aur ek roz

chhūne kī der thī ki vo paikar bichhaḌ gayā

phir dekhnā udāsī yahāñ phaḌphaḌā.egī

munDer se agar ye kabūtar bichhaḌ gayā

aisī dukhoñ kī bhiiḌ thī har sū lagī huī

'ātif' maiñ apne aap se aksar bichhaḌ gayā

diwar kho gai to kabhi dar bichhaD gaya

ek ek kar ke mujh se mera ghar bichhaD gaya

KHush to bahut hua hun jazire pe aa ke main

lekin ye dukh bhi hai ki samundar bichhaD gaya

aankhen jhapak ke dekhna mahnga paDa mujhe

lamhe ki der thi ki wo manzar bichhaD gaya

dastar us ke paon mein rakkhi to ye khula

jaan bach gai hamari magar sar bichhaD gaya

apni KHususiyat ka idrak tab hua

jab mujh se ek shab mera lashkar bichhaD gaya

sae pe iktifa na kiya aur ek roz

chhune ki der thi ki wo paikar bichhaD gaya

phir dekhna udasi yahan phaDphaDaegi

munDer se agar ye kabutar bichhaD gaya

aisi dukhon ki bhiD thi har su lagi hui

'atif' main apne aap se aksar bichhaD gaya