taswir ke rangon ka mizaj aur hi kuchh hai

tasvīr ke rangoñ kā mizāj aur hī kuchh hai

vo husn jo kal aur thā aaj aur hī kuchh hai

but-ḳhāne parastish ko banā karte the pahle

is daur meñ puujā kā rivāj aur hī kuchh hai

maazī meñ bhī ik jurm thā insān kā jiinā

jo ham ko milā hai vo samāj aur hī kuchh hai

maanā ki baḌā chain hai āñchal kī havā meñ

lekin mire zaḳhmoñ kā 'ilāj aur hī kuchh hai

ai bādshah-e-husn talab kar na zar-o-māl

ham ahl-e-muhabbat kā ḳhirāj aur hī kuchh hai

jhuk jaa.e 'qatīl' aap kā sar jis ko pahan kar

us taaj kī kyā baat vo taaj aur hī kuchh hai

taswir ke rangon ka mizaj aur hi kuchh hai

wo husn jo kal aur tha aaj aur hi kuchh hai

but-KHane parastish ko bana karte the pahle

is daur mein puja ka riwaj aur hi kuchh hai

mazi mein bhi ek jurm tha insan ka jina

jo hum ko mila hai wo samaj aur hi kuchh hai

mana ki baDa chain hai aanchal ki hawa mein

lekin mere zaKHmon ka 'ilaj aur hi kuchh hai

ai baadshah-e-husn talab kar na zar-o-mal

hum ahl-e-muhabbat ka KHiraj aur hi kuchh hai

jhuk jae 'qatil' aap ka sar jis ko pahan kar

us taj ki kya baat wo taj aur hi kuchh hai