jab bhi hum fikr ke gulzar mein aa jate hain

jab bhī ham fikr ke gulzār meñ aa jaate haiñ

lafz mahke hue ash'ār meñ aa jaate haiñ

ye jo ham bazm-e-adākār meñ aa jaate haiñ

aisā lagtā hai ki be-kār meñ aa jaate haiñ

go shikasta hī sahī dhuup se bachne ke liye

ham bhī is sāya-e-dīvār meñ aa jaate haiñ

kab se ik saath nahīñ baiThe haiñ mil kar ham log

aisā karte haiñ ki itvār meñ aa jaate haiñ

ye sunā hai ki yahāñ qīmateñ lag jaatī haiñ

aao ham bhī isī bāzār meñ aa jaate haiñ

kitnā poshīda rakheñ roz kī ḳhabroñ kī tarah

'ishq ke qisse to aḳhbār meñ aa jaate haiñ

koī ḳhvāhish na tamannā hai na fariyād koī

be-sabab aap ke darbār meñ aa jaate haiñ

laakh ahbāb se ham apne chhupā.eñ 'najmī'

sānahe ziist ke ash'ār meñ aa jaate haiñ

jab bhi hum fikr ke gulzar mein aa jate hain

lafz mahke hue ash'ar mein aa jate hain

ye jo hum bazm-e-adakar mein aa jate hain

aisa lagta hai ki be-kar mein aa jate hain

go shikasta hi sahi dhup se bachne ke liye

hum bhi is saya-e-diwar mein aa jate hain

kab se ek sath nahin baiThe hain mil kar hum log

aisa karte hain ki itwar mein aa jate hain

ye suna hai ki yahan qimaten lag jati hain

aao hum bhi isi bazar mein aa jate hain

kitna poshida rakhen roz ki KHabron ki tarah

'ishq ke qisse to aKHbar mein aa jate hain

koi KHwahish na tamanna hai na fariyaad koi

be-sabab aap ke darbar mein aa jate hain

lakh ahbab se hum apne chhupaen 'najmi'

sanahe zist ke ash'ar mein aa jate hain