ek tamasha jaan kar dil apna bahlane gae

ik tamāshā jaan kar dil apnā bahlāne ga.e

ek dīvāne ko kitne log samjhāne ga.e

'aish-o-ḳhush-hālī ke din meñ koī begāna na thā

sham' ke bujhte hī uḌ kar saare parvāne ga.e

pattharoñ ke darmiyāñ the yā thā sohbat kā asar

jauharī kī aañkh se mere na pahchāne ga.e

bhor meñ ḳhush ho ke kitnā jhūmne lagtā hai peḌ

us kī jānib kuchh parinde giit jab gaane ga.e

Dar hai saaqī kī saḳhāvat par na aañch aa.e kahīñ

mai-kade se le ke ḳhālī kitne paimāne ga.e

kyā ḳhabar thī bhuuk ke bā'is phañseñge jaal meñ

khet kī jānib parinde dekh kar daane ga.e

dar-haqīqat chand logoñ ke yahāñ tasnīf haiñ

mīr-o-ġhālib ke magar har ghar meñ afsāne ga.e

jab ḳhabar phailī ki kashtī phañs ga.ī girdāb meñ

shahr vaale ghaaT par tafrīh farmāne ga.e

ye kitābeñ ye rasā.il library meñ 'zafar'

keh rahī haiñ kis taraf urdu ke dīvāne ga.e

ek tamasha jaan kar dil apna bahlane gae

ek diwane ko kitne log samjhane gae

'aish-o-KHush-haali ke din mein koi begana na tha

sham' ke bujhte hi uD kar sare parwane gae

pattharon ke darmiyan the ya tha sohbat ka asar

jauhari ki aankh se mere na pahchane gae

bhor mein KHush ho ke kitna jhumne lagta hai peD

us ki jaanib kuchh parinde git jab gane gae

Dar hai saqi ki saKHawat par na aanch aae kahin

mai-kade se le ke KHali kitne paimane gae

kya KHabar thi bhuk ke ba'is phansenge jal mein

khet ki jaanib parinde dekh kar dane gae

dar-haqiqat chand logon ke yahan tasnif hain

mir-o-ghaalib ke magar har ghar mein afsane gae

jab KHabar phaili ki kashti phans gai girdab mein

shahr wale ghaT par tafrih farmane gae

ye kitaben ye rasail library mein 'zafar'

keh rahi hain kis taraf urdu ke diwane gae