hamari aankh se Dhalne laga guhar achchha

hamārī aañkh se Dhalne lagā guhar achchhā

ġham-e-jahāñ ne sikhāyā hameñ hunar achchhā

amiir dete haiñ laḌkoñ ko māl-o-zar achchhā

ġharīb beTiyāñ paa.eñ kahāñ se bar achchhā

the 'mīr'-o-'momin'-o-'zauq'-o-'zafar' bahut achchhe

hamāre 'ahd pe ġhālib kā hai asar achchhā

tavīl raah ke lamhe hasīn ho jaa.eñ

koī jo raah meñ mil jaa.e ham-safar achchhā

bharosā jis pe kiyā hai usī ne luuTā hai

hai qāfile ke liye kaun rāhbar achchhā

samā ga.ī hai kiran jis meñ mehr-e-tābāñ kī

kahā gayā usī shabnam ko bhī guhar achchhā

vo aur hoñge jo likhte haiñ sāhiloñ ko burā

qalam se maiñ nahīñ likhtā kabhī bhañvar achchhā

bas ek aap haiñ jis ke sabab basī duniyā

bashar kī shakl meñ dekhā nahīñ bashar achchhā

ba-juz husain ke duniyā ke goshe goshe meñ

kisī ne dekhā na neze pe koī sar achchhā

jo taptī dhuup meñ saaya kiye hue hai 'zafar'

hai tā.eroñ ke liye bhī vahī shajar achchhā

hamari aankh se Dhalne laga guhar achchha

gham-e-jahan ne sikhaya hamein hunar achchha

amir dete hain laDkon ko mal-o-zar achchha

gharib beTiyan paen kahan se bar achchha

the 'mir'-o-'momin'-o-'zauq'-o-'zafar' bahut achchhe

hamare 'ahd pe ghaalib ka hai asar achchha

tawil rah ke lamhe hasin ho jaen

koi jo rah mein mil jae ham-safar achchha

bharosa jis pe kiya hai usi ne luTa hai

hai qafile ke liye kaun rahbar achchha

sama gai hai kiran jis mein mehr-e-taban ki

kaha gaya usi shabnam ko bhi guhar achchha

wo aur honge jo likhte hain sahilon ko bura

qalam se main nahin likhta kabhi bhanwar achchha

bas ek aap hain jis ke sabab basi duniya

bashar ki shakl mein dekha nahin bashar achchha

ba-juz husain ke duniya ke goshe goshe mein

kisi ne dekha na neze pe koi sar achchha

jo tapti dhup mein saya kiye hue hai 'zafar'

hai taeron ke liye bhi wahi shajar achchha