hamara jazba bahar-taur etidal mein hai

hamārā jazba bahar-taur e'tidāl meñ hai

ye aur baat ki vo sho'la ishti'āl meñ hai

jo haq-pasand haiñ thoḌā sā intizār kareñ

ki ḳhush-ḳhayālī kā dariyā abhī ubaal meñ hai

kisī ko fikr nahīñ ranj-o-ġham ke māroñ kī

amīr-e-shahr kī shohrat magar uchhāl meñ hai

vahāñ bhī log hisār-e-sitam meñ jiite haiñ

sharīf aadmī yaañ bhī ḳharāb haal meñ hai

ye sun rahe haiñ ki be-had ghuTan meñ rahtī hai

vo machhlī qaid jo 'e'jāz' us ke jaal meñ hai

hamara jazba bahar-taur e'tidal mein hai

ye aur baat ki wo sho'la ishti'al mein hai

jo haq-pasand hain thoDa sa intizar karen

ki KHush-KHayali ka dariya abhi ubaal mein hai

kisi ko fikr nahin ranj-o-gham ke maron ki

amir-e-shahr ki shohrat magar uchhaal mein hai

wahan bhi log hisar-e-sitam mein jite hain

sharif aadmi yan bhi KHarab haal mein hai

ye sun rahe hain ki be-had ghuTan mein rahti hai

wo machhli qaid jo 'e'jaz' us ke jal mein hai