Dasne se jin ke sanp bhi jae hai jaan se

Dasne se jin ke saañp bhī jaa.e hai jaan se

zahrīle is qadar haiñ kuchh insāñ zabān se

bantī nahīñ banā.e mirī ḳhāndān se

guzre hai kyā har ek isī imtihān se

kaise kare yaqīn kisī aur par vo gul

ḳhatra jise ho shām-o-sahar bāġhbān se

lab kholne se pahle karo ḳhuub ġhaur tum

phir tiir lauTtā nahīñ niklā kamān se

khīñchī hai maiñ ne apnī ḳhushī yuuñ nasīb se

farhād jaise nahr nikāle chaTān se

kirdār meñ 'amal nazar aatā nahīñ tire

kuchh bhī badal na pā.egā apne bayān se

koī ḳhushī bhī lauT kar aa.e kabhī yahāñ

nikle kabhī to ġham kī nahūsat makān se

hāthoñ se apne dafn kiyā hai unheñ bhī yaar

hote the jo qarīb kabhī apnī jaan se

duniyā ġhulām-e-'aql na samjhī ye mas.ala

maz.hab pare hai 'ishq-o-vafā kā gumān se

shāyad ki de sukūn 'mudassir' hameñ lahad

ham thak ga.e haiñ roz na.e imtihān se

Dasne se jin ke sanp bhi jae hai jaan se

zahrile is qadar hain kuchh insan zaban se

banti nahin banae meri KHandan se

guzre hai kya har ek isi imtihan se

kaise kare yaqin kisi aur par wo gul

KHatra jise ho sham-o-sahar baghban se

lab kholne se pahle karo KHub ghaur tum

phir tir lauTta nahin nikla kaman se

khinchi hai main ne apni KHushi yun nasib se

farhad jaise nahr nikale chaTan se

kirdar mein 'amal nazar aata nahin tere

kuchh bhi badal na paega apne bayan se

koi KHushi bhi lauT kar aae kabhi yahan

nikle kabhi to gham ki nahusat makan se

hathon se apne dafn kiya hai unhen bhi yar

hote the jo qarib kabhi apni jaan se

duniya ghulam-e-'aql na samjhi ye masala

mazhab pare hai 'ishq-o-wafa ka guman se

shayad ki de sukun 'mudassir' hamein lahad

hum thak gae hain roz nae imtihan se