aaKHir dam tak mard ne rishta karobari rakkha

āḳhir dam tak mard ne rishta kārobārī rakkhā

naqd jahez liyā thā lekin mahr udhārī rakkhā

āvāzoñ se Dartī to gūñgī bahrī ho jaatī

soch samajh kar hī maiñ ne lahja do-dhārī rakkhā

merī chīḳh ke chāroñ jānib qahqahe guuñj uTThe the

tab maiñ ne siine par sabr kā patthar bhārī rakkhā

maiñ ne to duniyā paa.ī hai band kitāboñ vaalī

chalte-phirte logoñ ne ḳhud ko aḳhbārī rakkhā

aañsū poñchhtī hī rahtī haiñ thoḌī thoḌī ḳhushiyāñ

par āñkhoñ ke riste ġham ne chashma jaarī rakkhā

huliya badal kar Dhoñg rachānā aatā nahīñ 'ḳhushbū' ko

allah vaalī ho kar bhī ḳhud ko sansārī rakkhā

aaKHir dam tak mard ne rishta karobari rakkha

naqd jahez liya tha lekin mahr udhaari rakkha

aawazon se Darti to gungi bahri ho jati

soch samajh kar hi main ne lahja do-dhaari rakkha

meri chiKH ke chaaron jaanib qahqahe gunj uTThe the

tab main ne sine par sabr ka patthar bhaari rakkha

main ne to duniya pai hai band kitabon wali

chalte-phirte logon ne KHud ko aKHbari rakkha

aansu ponchhti hi rahti hain thoDi thoDi KHushiyan

par aankhon ke riste gham ne chashma jari rakkha

huliya badal kar Dhong rachana aata nahin 'KHushbu' ko

allah wali ho kar bhi KHud ko sansari rakkha