sahra mein phul phul mein sahra khila raha

sahrā meñ phuul phuul meñ sahrā khilā rahā

dil hai ki jis meñ zaḳhm-e-tamannā khilā rahā

chehre pe mere chhāñv tirī zulf kī rahī

ḳhushbū khilī rahī mirā chehra khilā rahā

ik peḌ raakh ban ke havā meñ bikhar gayā

hairān huuñ ki phir bhī parinda khilā rahā

murjhā gayā yaqīn to be-had ḳhushī huī

yā'nī ki ik gumān sā ġhuncha khilā rahā

'bāsit' vo chashm-e-yās qayāmat se kam na thī

khiḌkī khulī rahī to ujālā khilā rahā

sahra mein phul phul mein sahra khila raha

dil hai ki jis mein zaKHm-e-tamanna khila raha

chehre pe mere chhanw teri zulf ki rahi

KHushbu khili rahi mera chehra khila raha

ek peD rakh ban ke hawa mein bikhar gaya

hairan hun ki phir bhi parinda khila raha

murjha gaya yaqin to be-had KHushi hui

ya'ni ki ek guman sa ghuncha khila raha

'basit' wo chashm-e-yas qayamat se kam na thi

khiDki khuli rahi to ujala khila raha