samne mere masihai ka phir dawa kiya

sāmne mere masīhā.ī kā phir dā'vā kiyā

kab marīz-e-'ishq ko tum ne kabhī achchhā kiyā

josh-e-vahshat baḌh gayā ruḳh jānib-e-sahrā kiyā

fasl-e-gul ne zaḳhm-e-dil ko aur bhī taaza kiyā

kyā huā maiñ ne mohabbat kā agar dā'vā kiyā

aap ne nā-haq raqīboñ se mirā shikva kiyā

vā.e-nākāmī na koī mudda'ā puurā huā

nāma-bar barsoñ vahāñ aayā kiyā jaayā kiyā

hijr kī shab be-kalī se dil kā ye 'ālam rahā

ḳhud taḌaptā rah gayā mujh ko bhī taḌpāyā kiyā

mai-kashī ko jab sū-e-gulshan chale ham mai-parast

sar pe aa kar abr-e-rahmat ne vahīñ saayā kiyā

chal ga.iiñ qātil pe bhī chhuriyāñ nigāh-e-yās kī

maiñ idhar taḌpā kiyā zālim udhar taḌpā kiyā

dam-ba-dam ghabrā ke vo ghar se nikal aate haiñ kyuuñ

kyā mire nāloñ ne phir bāb-e-asar ko vā kiyā

aa gayā rāh-e-majāzī se haqīqī kī taraf

baiTh kar but-ḳhāne meñ nūr-e-ḳhudā dekhā kiyā

dekhnā pachhtāoge 'bismil' bahut tum ek din

dil but-e-nā-āshnā ko de diyā be-jā kiyā

samne mere masihai ka phir da'wa kiya

kab mariz-e-'ishq ko tum ne kabhi achchha kiya

josh-e-wahshat baDh gaya ruKH jaanib-e-sahra kiya

fasl-e-gul ne zaKHm-e-dil ko aur bhi taza kiya

kya hua main ne mohabbat ka agar da'wa kiya

aap ne na-haq raqibon se mera shikwa kiya

wae-nakaami na koi mudda'a pura hua

nama-bar barson wahan aaya kiya jaya kiya

hijr ki shab be-kali se dil ka ye 'alam raha

KHud taDapta rah gaya mujh ko bhi taDpaya kiya

mai-kashi ko jab su-e-gulshan chale hum mai-parast

sar pe aa kar abr-e-rahmat ne wahin saya kiya

chal gain qatil pe bhi chhuriyan nigah-e-yas ki

main idhar taDpa kiya zalim udhar taDpa kiya

dam-ba-dam ghabra ke wo ghar se nikal aate hain kyun

kya mere nalon ne phir bab-e-asar ko wa kiya

aa gaya rah-e-majazi se haqiqi ki taraf

baiTh kar but-KHane mein nur-e-KHuda dekha kiya

dekhna pachhtaoge 'bismil' bahut tum ek din

dil but-e-na-ashna ko de diya be-ja kiya