raushni kuchh to mile jangal mein

raushnī kuchh to mile jangal meñ

aag lag jaa.e ghane jangal meñ

aap ko shahr meñ Dar lagtā hai

ham to be-ḳhauf rahe jangal meñ

ek ik shāḳh zabāñ ho jaa.e

koī āvāz to de jangal meñ

peḌ se peḌ lagā rahtā hai

pyaar hotā hai bhare jangal meñ

shahr meñ kaan taraste hī rahe

chahchahe ham ne sune jangal meñ

shaam hote hī utar aate haiñ

shoḳh pariyoñ ke pare jangal meñ

shoḳh hirnoñ ne qulāñcheñ mārīñ

mor ke raqs hue jangal meñ

ab bhī qadmoñ ke nishāñ milte haiñ

gaañv se duur pare jangal meñ

ab bhī phirtī hai koī parchhā.īñ

raat ke vaqt bhare jangal meñ

ḳhuub the hazrat-e-ādam 'alvī'

bastiyāñ chhoḌ ga.e jangal meñ

raushni kuchh to mile jangal mein

aag lag jae ghane jangal mein

aap ko shahr mein Dar lagta hai

hum to be-KHauf rahe jangal mein

ek ek shaKH zaban ho jae

koi aawaz to de jangal mein

peD se peD laga rahta hai

pyar hota hai bhare jangal mein

shahr mein kan taraste hi rahe

chahchahe hum ne sune jangal mein

sham hote hi utar aate hain

shoKH pariyon ke pare jangal mein

shoKH hirnon ne qulanchen marin

mor ke raqs hue jangal mein

ab bhi qadmon ke nishan milte hain

ganw se dur pare jangal mein

ab bhi phirti hai koi parchhain

raat ke waqt bhare jangal mein

KHub the hazrat-e-adam 'alwi'

bastiyan chhoD gae jangal mein