na mera jism hai koi na mera ghar koi

na mirā jism hai koī na mirā ghar koī

maiñ vo chehra huuñ ki jis kā nahīñ paikar koī

uTh ga.ī rasm mohabbat kī jahāñ se shāyad

ab nazar aatā nahīñ shahr meñ dil-bar koī

shaam kī laash pe ye sub.h kā mātam kaisā

raat kī kokh meñ kyā din kā hai paikar koī

goshe goshe meñ tasavvur kā ugaao sūraj

shahr-e-fardā meñ añdherā na rahe ghar koī

maiñ bhī ehsās kī lahroñ meñ jhakole khātā

mere sahrā meñ bhī lahrātā samundar koī

vaqt kī dhuup meñ pighle hue lamhoñ kī tarah

ādmī-zādoñ kā hotā nahīñ paikar koī

is kī tauqīr kā hai rāyat-e-hastī maz.har

kīmiyā ḳhaak se 'aiman' nahīñ baḌh kar koī

na mera jism hai koi na mera ghar koi

main wo chehra hun ki jis ka nahin paikar koi

uTh gai rasm mohabbat ki jahan se shayad

ab nazar aata nahin shahr mein dil-bar koi

sham ki lash pe ye subh ka matam kaisa

raat ki kokh mein kya din ka hai paikar koi

goshe goshe mein tasawwur ka ugao suraj

shahr-e-farda mein andhera na rahe ghar koi

main bhi ehsas ki lahron mein jhakole khata

mere sahra mein bhi lahraata samundar koi

waqt ki dhup mein pighle hue lamhon ki tarah

aadmi-zadon ka hota nahin paikar koi

is ki tauqir ka hai rayat-e-hasti mazhar

kimiya KHak se 'aiman' nahin baDh kar koi