mera jiwan to tha be-ab sarabon jaisa

merā jīvan to thā be-āb sarāboñ jaisā

terī chāhat ne kiyā is ko chanāboñ jaisā

terī furqat meñ mire dil kī 'ajab hālat hai

mausam-e-gul bhī lage mujh ko 'azāboñ jaisā

kushta-e-ġham se mulāqāt kā vā'da terā

dard kī dhuup meñ sahrā hai sahāboñ jaisā

sāġhar-e-mai meñ faqat qaid nahīñ hai mastī

kuchh anāoñ meñ bhī nashsha hai sharāboñ jaisā

mere ehsās meñ ḳhush-bū sī rachī hai 'jazbī'

koī mahkā hai tasavvur meñ gulāboñ jaisā

mera jiwan to tha be-ab sarabon jaisa

teri chahat ne kiya is ko chanabon jaisa

teri furqat mein mere dil ki 'ajab haalat hai

mausam-e-gul bhi lage mujh ko 'azabon jaisa

kushta-e-gham se mulaqat ka wa'da tera

dard ki dhup mein sahra hai sahabon jaisa

saghar-e-mai mein faqat qaid nahin hai masti

kuchh anaon mein bhi nashsha hai sharabon jaisa

mere ehsas mein KHush-bu si rachi hai 'jazbi'

koi mahka hai tasawwur mein gulabon jaisa