maine dhuen ko KHwab samajhne ki bhul ki

maiñ ne dhūeñ ko ḳhvāb samajhne kī bhuul kī

sahrā meñ ik sarāb samajhne kī bhuul kī

chehre pe patlī oḌhnī Daale khaḌī thī vo

par maiñ ne be-hijāb samajhne kī bhuul kī

afsos maiñ bhī bhiiḌ kā hissa banā rahā

fitne ko inqilāb samajhne kī bhuul kī

jo ghar meñ ruk sakā na use dil meñ rakh liyā

zarre ko āftāb samajhne kī bhuul kī

maḳhfī 'ibāratoñ kā vo 'umda lifāfa thā

ham ne use kitāb samajhne kī bhuul kī

'az.har' tumheñ ḳhabar hai ki gulshan ke ḳhaar ko

champā kañval gulāb samajhne kī bhuul kī

main ne dhuen ko KHwab samajhne ki bhul ki

sahra mein ek sarab samajhne ki bhul ki

chehre pe patli oDhni Dale khaDi thi wo

par main ne be-hijab samajhne ki bhul ki

afsos main bhi bhiD ka hissa bana raha

fitne ko inqilab samajhne ki bhul ki

jo ghar mein ruk saka na use dil mein rakh liya

zarre ko aaftab samajhne ki bhul ki

maKHfi 'ibaraton ka wo 'umda lifafa tha

hum ne use kitab samajhne ki bhul ki

'azhar' tumhein KHabar hai ki gulshan ke KHar ko

champa kanwal gulab samajhne ki bhul ki