lamha lamha hai qayamat si bapa KHwabon mein

lamha lamha hai qayāmat sī bapā ḳhvāboñ meñ

kis ḳhatā kī mujhe miltī hai sazā ḳhvāboñ meñ

jo añdhere meñ rahā barf-jazīre kī tarah

vo jahāñ ātish-e-sayyāl huā ḳhvāboñ meñ

jism meñ aag ki āñkhoñ meñ hai sahrā koī

vāqi'a hai ki uThī garm havā ḳhvāboñ meñ

ik maqām aisā kabhī rāh-e-junūñ meñ aayā

ek lamhe meñ koī TuuT gayā ḳhvāboñ meñ

pāk-dāman haiñ kahāñ mere badan kī sub.heñ

kaañp uThte haiñ mire dast-e-du'ā ḳhvāboñ meñ

sāhib-e-‘ishq huuñ rūdād suno merī bhī

kaise tārāj huā taḳht-e-sabā ḳhvāboñ meñ

yuuñ lab-e-sang se phūTegā tirā nūr-e-sahar

ik tabassum se yahī raaz khulā ḳhvāboñ meñ

lamha lamha hai qayamat si bapa KHwabon mein

kis KHata ki mujhe milti hai saza KHwabon mein

jo andhere mein raha barf-jazire ki tarah

wo jahan aatish-e-sayyal hua KHwabon mein

jism mein aag ki aankhon mein hai sahra koi

waqi'a hai ki uThi garm hawa KHwabon mein

ek maqam aisa kabhi rah-e-junun mein aaya

ek lamhe mein koi TuT gaya KHwabon mein

pak-daman hain kahan mere badan ki subhen

kanp uThte hain mere dast-e-du'a KHwabon mein

sahib-e-‘ishq hun rudad suno meri bhi

kaise taraj hua taKHt-e-saba KHwabon mein

yun lab-e-sang se phuTega tera nur-e-sahar

ek tabassum se yahi raaz khula KHwabon mein