kahne ko hai muddat se tamashai hamari

kahne ko hai muddat se tamāshā.ī hamārī

duniyā ne kahāñ dekhī hai lailā.ī hamārī

āñkhoñ se tirī yaad kā bahtā hai lahū roz

mumkin hai ki ab jā.egī bīnā.ī hamārī

ab aap se to ham ko tavaqqo' hī nahīñ thī

ab aap se hotī hai pazīrā.ī hamārī

jab terī mohabbat ke qasīde nahīñ hoñge

kis kaam kī phir hogī ye goyā.ī hamārī

is dasht meñ to ḳhud kī hameñ fikr nahīñ hai

ab kaam nahīñ aa.egī dānā.ī hamārī

ye aap kā darbār hai munsif bhī yahāñ aap

ho hī nahīñ saktī yahāñ shunvā.ī hamārī

sahrā kā hai kirdār baḌā 'ishq meñ 'rūbī'

kyuuñ laash vahāñ par nahīñ dafnā.ī hamārī

kahne ko hai muddat se tamashai hamari

duniya ne kahan dekhi hai lailai hamari

aankhon se teri yaad ka bahta hai lahu roz

mumkin hai ki ab jaegi binai hamari

ab aap se to hum ko tawaqqo' hi nahin thi

ab aap se hoti hai pazirai hamari

jab teri mohabbat ke qaside nahin honge

kis kaam ki phir hogi ye goyai hamari

is dasht mein to KHud ki hamein fikr nahin hai

ab kaam nahin aaegi danai hamari

ye aap ka darbar hai munsif bhi yahan aap

ho hi nahin sakti yahan shunwai hamari

sahra ka hai kirdar baDa 'ishq mein 'rubi'

kyun lash wahan par nahin dafnai hamari