gham-e-duniya gham-e-ulfat ki kahani likkhun
ġham-e-duniyā ġham-e-ulfat kī kahānī likkhūñ
aur kab tak vahī bāteñ maiñ purānī likkhūñ
ik ḳhalish dil meñ jo baaqī hai faqat tere sabab
sochtā huuñ ki use terī nishānī likkhūñ
dil meñ rah rah ke ubalte rahe jazbāt mire
kitnī āñkhoñ se huī sho’la-fishānī likkhūñ
'ārzī koī bhī tarkīb nahīñ kar saktā
dā.imī kaise kisī lafz kā mā'nī likkhūñ
mun'akis is meñ bhī hote haiñ sabhī ke chehre
aa.ine ko bhī maiñ Thahrā huā paanī likkhūñ
kaun is dasht meñ 'farhān' kā sāthī hogā
kis ke maiñ naam bhalā sahrā-makānī likkhūñ
gham-e-duniya gham-e-ulfat ki kahani likkhun
aur kab tak wahi baaten main purani likkhun
ek KHalish dil mein jo baqi hai faqat tere sabab
sochta hun ki use teri nishani likkhun
dil mein rah rah ke ubalte rahe jazbaat mere
kitni aankhon se hui sho’la-fishani likkhun
'arzi koi bhi tarkib nahin kar sakta
daimi kaise kisi lafz ka ma'ni likkhun
mun'akis is mein bhi hote hain sabhi ke chehre
aaine ko bhi main Thahra hua pani likkhun
kaun is dasht mein 'farhan' ka sathi hoga
kis ke main nam bhala sahra-makani likkhun
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
