dasht-e-imkan ke safar ka KHwab oDha so gae

dasht-e-imkāñ ke safar kā ḳhvāb oḌhā so ga.e

ḳhvāb kā bistar bichhāyā ḳhvāb oḌhā so ga.e

ek sahrā aañkh meñ thā ek dariyā dil meñ thā

ret ne donoñ ko Dhāñpā ḳhvāb oḌhā so ga.e

'umr bhar dīvār se sar apnā Takrāte rahe

jab na koī dar huā vā ḳhvāb oḌhā so ga.e

shahr bhar meñ DhūñDte phirte rahe apnā nishāñ

jab kahīñ ḳhud ko na paayā ḳhvāb oḌhā so ga.e

ham ne malbe meñ bhī DhūñDī zindagī kī raushnī

koī jugnū jab na chamkā ḳhvāb oḌhā so ga.e

dhuup uTh kar apnī āñkheñ mal rahī thī jab 'nadīm'

jism se saaya utārā ḳhvāb oḌhā so ga.e

dasht-e-imkan ke safar ka KHwab oDha so gae

KHwab ka bistar bichhaya KHwab oDha so gae

ek sahra aankh mein tha ek dariya dil mein tha

ret ne donon ko Dhanpa KHwab oDha so gae

'umr bhar diwar se sar apna Takraate rahe

jab na koi dar hua wa KHwab oDha so gae

shahr bhar mein DhunDte phirte rahe apna nishan

jab kahin KHud ko na paya KHwab oDha so gae

hum ne malbe mein bhi DhunDi zindagi ki raushni

koi jugnu jab na chamka KHwab oDha so gae

dhup uTh kar apni aankhen mal rahi thi jab 'nadim'

jism se saya utara KHwab oDha so gae