aasar-e-ab sail-e-sada ranj-e-raegan

āsār-e-āb sail-e-sadā ranj-e-rā.egāñ

kyā kyā huā kī zad pe laraztā hai bādbāñ

paanī pe kāñptā hai koī paara paara 'aks

patthar ko chāTtā hai koī naqsh-e-be-nishāñ

jaise gul-e-siyāh bikhartā ho 'arsh par

girtī haiñ āsmāñ se añdhere kī pattiyāñ

kis dasht-e-be-kanār meñ tanhā khaḌā huuñ maiñ

saare badan meñ ret kī lahreñ sī haiñ davāñ

ab maiñ nahīñ to mere sivā sab safar meñ haiñ

suntā huuñ abr se dil-e-dariyā kī dāstāñ

mauj-e-havas ubhar ke vahīñ rah ga.ī 'zafar'

dīvār-e-dostī thī mire us ke darmiyāñ

aasar-e-ab sail-e-sada ranj-e-raegan

kya kya hua ki zad pe larazta hai baadban

pani pe kanpta hai koi para para 'aks

patthar ko chaTta hai koi naqsh-e-be-nishan

jaise gul-e-siyah bikharta ho 'arsh par

girti hain aasman se andhere ki pattiyan

kis dasht-e-be-kanar mein tanha khaDa hun main

sare badan mein ret ki lahren si hain dawan

ab main nahin to mere siwa sab safar mein hain

sunta hun abr se dil-e-dariya ki dastan

mauj-e-hawas ubhar ke wahin rah gai 'zafar'

diwar-e-dosti thi mere us ke darmiyan