koi hoga wo talatum se jo haara hoga

koī hogā vo talātum se jo haarā hogā

Dūbne vaale ko tinke kā sahārā hogā

husn be-rang bhī jiine kā sahārā hogā

dīda-e-dil se jo masrūf-e-nazāra hogā

vaqt kī aaḌ meñ ik shor thā tūfānoñ kā

maiñ ne samjhā thā ki sāhil ne pukārā hogā

isī gardish meñ hai jam’iyyat-e-ḳhātir kā payām

yahī tūfān kisī roz kinārā hogā

is kī aahaT meñ kabhī dhuup kabhī chhāñv hai

vaqt hai vaqt hamārā na tumhārā hogā

rāhat-e-qalb-o-nazar hai usī mustaqbil meñ

apne hāthoñ se jise ġham ne sañvārā hogā

dekhne vāloñ kī āñkhoñ kā hai dhokā 'hindī'

raqs-e-bismil nahīñ ye sub.h kā taarā hogā

koi hoga wo talatum se jo haara hoga

Dubne wale ko tinke ka sahaara hoga

husn be-rang bhi jine ka sahaara hoga

dida-e-dil se jo masruf-e-nazara hoga

waqt ki aaD mein ek shor tha tufanon ka

main ne samjha tha ki sahil ne pukara hoga

isi gardish mein hai jam’iyyat-e-KHatir ka payam

yahi tufan kisi roz kinara hoga

is ki aahaT mein kabhi dhup kabhi chhanw hai

waqt hai waqt hamara na tumhaara hoga

rahat-e-qalb-o-nazar hai usi mustaqbil mein

apne hathon se jise gham ne sanwara hoga

dekhne walon ki aankhon ka hai dhoka 'hindi'

raqs-e-bismil nahin ye subh ka tara hoga