دل میں رہ کر وہ یوں جدا گزرے

دل میں رہ کر وہ یوں جدا گزرے

ساز سے جس طرح صدا گزرے

موت کا تھا جہاں پہ سناٹا

ہم وہاں بھی غزل سرا گزرے

آنکھ غنچوں کی کھل نہ جائے کہیں

چپکے چپکے ذرا صبا گزرے

راہ صحرا بھی ہو گئی گلزار

اس طرح ہم برہنہ پا گزرے

ہائے یہ بے چراغ کاشانے

اس طرف بھی کبھی خدا گزرے

آج ہونٹوں پہ یوں ہنسی آئی

جس طرح کوئی سانحا گزرے

وہ اگر بے نقاب ہو جائیں

روشنی پر نہ جانے کیا گزرے

خود کو ہم ڈھونڈتے رہے شاعرؔ

ایسے لمحے بھی بارہا گزرے