dil mein rah kar wo yun juda guzre

dil meñ rah kar vo yuuñ judā guzre

saaz se jis tarah sadā guzre

maut kā thā jahāñ pe sannāTā

ham vahāñ bhī ġhazal-sarā guzre

aañkh ġhunchoñ kī khul na jaa.e kahīñ

chupke chupke zarā sabā guzre

rāh-e-sahrā bhī ho ga.ī gulzār

is tarah ham barahna-pā guzre

haa.e ye be-charāġh kāshāne

is taraf bhī kabhī ḳhudā guzre

aaj hoñToñ pe yuuñ hañsī aa.ī

jis tarah koī sānehā guzre

vo agar be-naqāb ho jaa.eñ

raushnī par na jaane kyā guzre

ḳhud ko ham DhūñDte rahe 'shā'ir'

aise lamhe bhī bār-hā guzre

dil mein rah kar wo yun juda guzre

saz se jis tarah sada guzre

maut ka tha jahan pe sannaTa

hum wahan bhi ghazal-sara guzre

aankh ghunchon ki khul na jae kahin

chupke chupke zara saba guzre

rah-e-sahra bhi ho gai gulzar

is tarah hum barahna-pa guzre

hae ye be-charagh kashane

is taraf bhi kabhi KHuda guzre

aaj honTon pe yun hansi aai

jis tarah koi saneha guzre

wo agar be-naqab ho jaen

raushni par na jaane kya guzre

KHud ko hum DhunDte rahe 'sha'ir'

aise lamhe bhi bar-ha guzre