جو اس طرف سے مسلسل بہاؤ آئے گا

جو اس طرف سے مسلسل بہاؤ آئے گا

یہ بند کچا ہے اس میں کٹاؤ آئے گا

ابھی سے راہ میں رکنے کی جستجو کیسی

سفر طویل ہے آگے پڑاؤ آئے گا

رہو گے بزم میں بالقصد دور گر ہم سے

تعلقات میں اس سے کھچاؤ آئے گا

وہ آ گیا ہے نا اک بار ہی بلانے پر

کہا تھا پہلے ہی اس کو بلاؤ آئے گا

کھڑے اصولوں کی خاطر ہوئے ہو اچھا ہے

مگر سمجھ لو یہ تم پر دباؤ آئے گا

اضافی زر کی طلب جتنی بڑھتی جائے گی

ہماری قدروں میں اتنا گراؤ آئے گا

نویدؔ بھیجو اسے کیک اور گلدستہ

یہ بھول جاتے ہو کب رکھ رکھاؤ آئے گا