jo us taraf se musalsal bahaw aaega

jo us taraf se musalsal bahāv aa.egā

ye band kachchā hai is meñ kaTāv aa.egā

abhī se raah meñ rukne kī justujū kaisī

safar tavīl hai aage paḌāv aa.egā

rahoge bazm meñ bil-qasd duur gar ham se

ta'alluqāt meñ is se khichāv aa.egā

vo aa gayā hai nā ik baar hī bulāne par

kahā thā pahle hī us ko bulāo aa.egā

khaḌe usūloñ kī ḳhātir hue ho achchhā hai

magar samajh lo ye tum par dabāv aa.egā

izāfī zar kī talab jitnī baḌhtī jā.egī

hamārī qadroñ meñ utnā girāv aa.egā

'naved' bhejo use cake aur guldasta

ye bhuul jaate ho kab rakh-rakhāv aa.egā

jo us taraf se musalsal bahaw aaega

ye band kachcha hai is mein kaTaw aaega

abhi se rah mein rukne ki justuju kaisi

safar tawil hai aage paDaw aaega

rahoge bazm mein bil-qasd dur gar hum se

ta'alluqat mein is se khichaw aaega

wo aa gaya hai na ek bar hi bulane par

kaha tha pahle hi us ko bulao aaega

khaDe usulon ki KHatir hue ho achchha hai

magar samajh lo ye tum par dabaw aaega

izafi zar ki talab jitni baDhti jaegi

hamari qadron mein utna giraw aaega

'nawed' bhejo use cake aur guldasta

ye bhul jate ho kab rakh-rakhaw aaega