hum chal to paDe ai jazba-e-dil jaana hai kidhar malum nahin

ham chal to paḌe ai jazba-e-dil jaanā hai kidhar mā'lūm nahīñ

āġhāz-e-safar par nāzāñ haiñ anjām-e-safar mā'lūm nahīñ

kab jaam bhare kab daur chale kab aa.e idhar mā'lūm nahīñ

uTThī bhī agar Thahregī kahāñ saaqī kī nazar mā'lūm nahīñ

ham nik.hat-e-gesū kī kab se ik aas lagā.e baiThe haiñ

aatī hai kidhar se bād-e-sabā jaatī hai kidhar mā'lūm nahīñ

mumkin ho to ik lamhe ko zarā taklīf-e-tabassum kar liije

ham meñ se abhī tak kitnoñ ko mafhūm-e-sahar mā'lūm nahīñ

jazbāt ke sau 'ālam guzre ehsās kī sadiyāñ biit ga.iiñ

āñkhoñ se abhī un āñkhoñ tak kitnā hai safar mā'lūm nahīñ

kyā haal hamārā rahtā hai kyā un ko zamāna kahtā hai

achchhā hai unheñ mā'lūm na ho kuchh un ko agar mā'lūm nahīñ

'iqbāl' hamārā josh-e-talab kyā jaane kidhar le jā.egā

nikle haiñ talāsh-e-manzil meñ aur rāhguzar mā'lūm nahīñ

hum chal to paDe ai jazba-e-dil jaana hai kidhar ma'lum nahin

aaghaz-e-safar par nazan hain anjam-e-safar ma'lum nahin

kab jam bhare kab daur chale kab aae idhar ma'lum nahin

uTThi bhi agar Thahregi kahan saqi ki nazar ma'lum nahin

hum nikhat-e-gesu ki kab se ek aas lagae baiThe hain

aati hai kidhar se baad-e-saba jati hai kidhar ma'lum nahin

mumkin ho to ek lamhe ko zara taklif-e-tabassum kar lije

hum mein se abhi tak kitnon ko mafhum-e-sahar ma'lum nahin

jazbaat ke sau 'alam guzre ehsas ki sadiyan bit gain

aankhon se abhi un aankhon tak kitna hai safar ma'lum nahin

kya haal hamara rahta hai kya un ko zamana kahta hai

achchha hai unhen ma'lum na ho kuchh un ko agar ma'lum nahin

'iqbaal' hamara josh-e-talab kya jaane kidhar le jaega

nikle hain talash-e-manzil mein aur rahguzar ma'lum nahin