aKHlaq se aala hota hai kirdar se behtar hota hai

aḳhlāq se aa'lā hotā hai kirdār se behtar hotā hai

har baar nazar karnā ḳhud par har baar se behtar hotā hai

gar vasl nahīñ to hijr sahī ham us ke sahāre jī leñge

darvāza bhale hī band rahe dīvār se behtar hotā hai

har shai kī apnī ḳhūbī hai har shai meñ us kā jalva hai

ye kis ne kahā hai gulchīñ se gul ḳhaar se behtar hotā hai

kyoñ roz kī ḳhabreñ paḌhte ho kyuuñ apne sar ko dhunte ho

insān kā chehrā paḌh lenā aḳhbār se behtar hotā hai

jab 'āshiq sachchā 'āshiq ho mā'shūq nahīñ baaqī rahtā

jab dā.era banñe lagtā hai parkār se behtar hotā hai

lafzoñ kī zarūrat hai hī nahīñ kyoñ lab ko zahmat dī jaa.e

apne ko tamāsha kar lenā inkār se behtar hotā hai

aKHlaq se aa'la hota hai kirdar se behtar hota hai

har bar nazar karna KHud par har bar se behtar hota hai

gar wasl nahin to hijr sahi hum us ke sahaare ji lenge

darwaza bhale hi band rahe diwar se behtar hota hai

har shai ki apni KHubi hai har shai mein us ka jalwa hai

ye kis ne kaha hai gulchin se gul KHar se behtar hota hai

kyon roz ki KHabren paDhte ho kyun apne sar ko dhunte ho

insan ka chehra paDh lena aKHbar se behtar hota hai

jab 'ashiq sachcha 'ashiq ho ma'shuq nahin baqi rahta

jab daera banne lagta hai parkar se behtar hota hai

lafzon ki zarurat hai hi nahin kyon lab ko zahmat di jae

apne ko tamasha kar lena inkar se behtar hota hai