jab uThi shamshir-e-zalim zulm Dhane ke liye

jab uThī shamshīr-e-zālim zulm Dhāne ke liye

josh par aa.ī mohabbat sar kaTāne ke liye

terī ḳhātir jaane kis kis se mohabbat kī ga.ī

mere hamdam ek terā pyaar paane ke liye

aaj phir merī nazar un kī nazar se mil ga.ī

muddateñ lag jā.eñgī ab hosh aane ke liye

is liye murshid ke dar par jā rahe haiñ dosto

zaḳhm-e-dil hote nahīñ sab ko dikhāne ke liye

ik zarā sī Thes pahuñchī aur bikhar kar rah ga.e

aap to tayyār the sab kuchh luTāne ke liye

ek būḌhe baap ne ḳhud ko bhī girvī rakh diyā

sirf apnī beTiyoñ ke ghar basāne ke liye

muddatoñ ke baa'd kaise muskurā.e ho 'nizām'

kyā unheñ fursat nahīñ thī yaad aane ke liye

jab uThi shamshir-e-zalim zulm Dhane ke liye

josh par aai mohabbat sar kaTane ke liye

teri KHatir jaane kis kis se mohabbat ki gai

mere hamdam ek tera pyar pane ke liye

aaj phir meri nazar un ki nazar se mil gai

muddaten lag jaengi ab hosh aane ke liye

is liye murshid ke dar par ja rahe hain dosto

zaKHm-e-dil hote nahin sab ko dikhane ke liye

ek zara si Thes pahunchi aur bikhar kar rah gae

aap to tayyar the sab kuchh luTane ke liye

ek buDhe bap ne KHud ko bhi girwi rakh diya

sirf apni beTiyon ke ghar basane ke liye

muddaton ke ba'd kaise muskurae ho 'nizam'

kya unhen fursat nahin thi yaad aane ke liye