ai tu ki roz-o-shab ko mah-o-aftab de
ai tū ki roz-o-shab ko mah-o-āftāb de
barsoñ kī jāgtī huī āñkhoñ ko ḳhvāb de
maiñ vo ki naqsh-gar tire arz-o-samā kā huuñ
tū vo ki mujh ko donoñ jahāñ kā 'azāb de
sunte haiñ us ke haath qalam kar diye gaye
jo shaḳhs pattharoñ ko nagīnoñ kī aab de
maiñ ne to tan badan kā lahū nazr kar diyā
ai shahryār tū bhī to apnā hisāb de
kis dil meñ bo rahe ho tamannā ke biij tum
ye dukh kī sar-zamīn to kaale gulāb de
maiñ sar-ba-kaf huuñ teġh-e-sitam-gar ke sāmne
ab is se baḌh ke kyā koī us ko javāb de
ai tu ki roz-o-shab ko mah-o-aftab de
barson ki jagti hui aankhon ko KHwab de
main wo ki naqsh-gar tere arz-o-sama ka hun
tu wo ki mujh ko donon jahan ka 'azab de
sunte hain us ke hath qalam kar diye gaye
jo shaKHs pattharon ko naginon ki aab de
main ne to tan badan ka lahu nazr kar diya
ai shahryar tu bhi to apna hisab de
kis dil mein bo rahe ho tamanna ke bij tum
ye dukh ki sar-zamin to kale gulab de
main sar-ba-kaf hun tegh-e-sitam-gar ke samne
ab is se baDh ke kya koi us ko jawab de
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
