yun riya aam hui hai ki rawa lagti hai

yuuñ riyā 'aam huī hai ki ravā lagtī hai

talḳh sī baat sahī baat ḳhudā lagtī hai

hama-tash.hīr huā ab mirā gum-sum rahnā

shāyad ab merī ḳhamoshī bhī sadā lagtī hai

vahī resham se subuk haath vahī phuul sā jism

vahī sūrat hai jahāñ aañkh zarā lagtī hai

pā ke ḳhush bhī nahīñ kuchh kho ke pareshāñ bhī nahīñ

aarzū 'ishq meñ rāzī-ba-razā lagtī hai

ġham-e-dūrī bhī gayā lutf-e-huzūrī bhī gayā

be-hisī dil kī 'ajab aaj sivā lagtī hai

phir junūñ shahr meñ tā'zīr-talab hai 'gauhar'

nigah-e-ḳhalq phir angusht-numā lagtī hai

yun riya 'am hui hai ki rawa lagti hai

talKH si baat sahi baat KHuda lagti hai

hama-tashhir hua ab mera gum-sum rahna

shayad ab meri KHamoshi bhi sada lagti hai

wahi resham se subuk hath wahi phul sa jism

wahi surat hai jahan aankh zara lagti hai

pa ke KHush bhi nahin kuchh kho ke pareshan bhi nahin

aarzu 'ishq mein raazi-ba-raza lagti hai

gham-e-duri bhi gaya lutf-e-huzuri bhi gaya

be-hisi dil ki 'ajab aaj siwa lagti hai

phir junun shahr mein ta'zir-talab hai 'gauhar'

nigah-e-KHalq phir angusht-numa lagti hai