us pe jab jab meri nazar jae

us pe jab jab mirī nazar jaa.e

sharm se aur vo nikhar jaa.e

phir mirī zindagī sañvar jaa.e

vo jo is ruuh meñ utar jaa.e

us ġhazal se hai is qadar ulfat

dil na us ko paḌhe to mar jaa.e

jis ko apnoñ ne mil ke luuT liyā

aadmī vo bhalā kidhar jaa.e

reza reza maiñ ho gayā jaise

aa.ina TuuT kar bikhar jaa.e

jhuuT ke log yuuñ haiñ dīvāne

sach maiñ bolūñ to merā sar jaa.e

tum ye āñkheñ sañbhāl kar rakhnā

Duub kar phir na koī mar jaa.e

kitne patthar paḌe haiñ raste meñ

jo bhī jaa.e vo dekh kar jaa.e

tum mire sabr se nahīñ vāqif

vaar us kā na be-asar jaa.e

hausle mere lauT aa.e haiñ

ġham se keh do vo apne ghar jaa.e

tum ḳhafā ho to aisā lagtā hai

jism se jaan kuuch kar jaa.e

is qadar un kī be-ruḳhī 'amjad'

zindagī zindagī se Dar jaa.e

us pe jab jab meri nazar jae

sharm se aur wo nikhar jae

phir meri zindagi sanwar jae

wo jo is ruh mein utar jae

us ghazal se hai is qadar ulfat

dil na us ko paDhe to mar jae

jis ko apnon ne mil ke luT liya

aadmi wo bhala kidhar jae

reza reza main ho gaya jaise

aaina TuT kar bikhar jae

jhuT ke log yun hain diwane

sach main bolun to mera sar jae

tum ye aankhen sanbhaal kar rakhna

Dub kar phir na koi mar jae

kitne patthar paDe hain raste mein

jo bhi jae wo dekh kar jae

tum mere sabr se nahin waqif

war us ka na be-asar jae

hausle mere lauT aae hain

gham se keh do wo apne ghar jae

tum KHafa ho to aisa lagta hai

jism se jaan kuch kar jae

is qadar un ki be-ruKHi 'amjad'

zindagi zindagi se Dar jae