parde mein yun to phul khila ehtiyat ka

parde meñ yuuñ to phuul khilā ehtiyāt kā

charchā hai shahr bhar meñ usī vārdāt kā

phir aag se guzar ke miTī hai siyāh bhuuk

aaTā tanūr meñ nazar aayā parāt kā

mohlat hī dī na apne dil-e-shar-pasand ne

parhez thā use to bahut chhūt-chhāt kā

moḌā jo chehra saath vo saarā hī muḌ gayā

jaise banā huā thā kisī saḳht dhaat kā

do chaar haath kheliye khul kar bas apne saath

aisā nahīñ ḳhayāl hameñ jiit maat kā

sab raushnā.ī uḌ ga.ī shab bhar meñ kyā likheñ

Dhaknā khulā rahā kahīñ dil kī davāt kā

ghar bech kar hī ab ke chukāyā hai qarz-e-ġham

ham bojh kab sahār sake us kī baat kā

kuchh ret phailtī huī sahrā-e-sabr kī

kuchh zor TūTtā huā dariyā-e-zāt kā

āñkhoñ se aate jaate ulajhtā hai ai 'zafar'

dīvār par likhā huā kuchh us ke haat kā

parde mein yun to phul khila ehtiyat ka

charcha hai shahr bhar mein usi wardat ka

phir aag se guzar ke miTi hai siyah bhuk

aaTa tanur mein nazar aaya paraat ka

mohlat hi di na apne dil-e-shar-pasand ne

parhez tha use to bahut chhut-chhat ka

moDa jo chehra sath wo sara hi muD gaya

jaise bana hua tha kisi saKHt dhat ka

do chaar hath kheliye khul kar bas apne sath

aisa nahin KHayal hamein jit mat ka

sab raushnai uD gai shab bhar mein kya likhen

Dhakna khula raha kahin dil ki dawat ka

ghar bech kar hi ab ke chukaya hai qarz-e-gham

hum bojh kab sahaar sake us ki baat ka

kuchh ret phailti hui sahra-e-sabr ki

kuchh zor TuTta hua dariya-e-zat ka

aankhon se aate jate ulajhta hai ai 'zafar'

diwar par likha hua kuchh us ke hat ka