maqam-e-shukr hai ai dil shab-e-karb-o-bala guzri

maqām-e-shukr hai ai dil shab-e-karb-o-balā guzrī

shikāyat kyā gila kaisā agar āhista-pā guzrī

jab aa.ī thī jafā kī bijliyāñ bhī saath laa.ī thī

magar siine meñ raushan kar ke qindīl-e-vafā guzrī

ḳhudā hī jāntā hai kis tarah ham ne guzārī thī

vo lambī aur kaalī raat jo tum se judā guzrī

'adū ke jaur se jo kuchh bhī biitī thī so biitī thī

magar jo dost ke hāthoñ sar-e-ahl-e-valā guzrī

sabā aa.ī ho uttar se kaho kuchh ḳhuld-e-arzī kī

junūñ kī kyā sazā Thahrī gul-o-lāla pe kyā guzrī

maqam-e-shukr hai ai dil shab-e-karb-o-bala guzri

shikayat kya gila kaisa agar aahista-pa guzri

jab aai thi jafa ki bijliyan bhi sath lai thi

magar sine mein raushan kar ke qindil-e-wafa guzri

KHuda hi jaanta hai kis tarah hum ne guzari thi

wo lambi aur kali raat jo tum se juda guzri

'adu ke jaur se jo kuchh bhi biti thi so biti thi

magar jo dost ke hathon sar-e-ahl-e-wala guzri

saba aai ho uttar se kaho kuchh KHuld-e-arzi ki

junun ki kya saza Thahri gul-o-lala pe kya guzri